እውነቱን እውነት ፤ ሀሰቱንም ሀሰት ማለት ይገባል!! መቻቻልና መገናዘብም ፤ መበራረዝና መቀላቀል እንዳይሆን መጠንቀቅ ያስፈልጋል፡፡

በስመ አብ ወወልድ ወመንፈስ ቅዱስ አሐዱ አምላክ አሜን፡፡

እውነቱን እውነት ፤ ሀሰቱንም ሀሰት ማለት ይገባል!!

መቻቻልና መገናዘብም ፤ መበራረዝና መቀላቀል እንዳይሆን መጠንቀቅ ያስፈልጋል፡፡

ጤና ይስጥልን …

ይህችን አጭር ማስታወሻ (አስተያየት) ለመጻፍ ያነሳሳን ጉዳይ …. ከሰሞኑ ራሱን እስላማዊ መንግስት ብሎ በሚጠራው አሸባሪ ቡድን በክርስቲያን ወንድሞቻችን ላይ የተፈጸመውን አረመኔያዊ የግድያ ተግባር ተከትሎ ፤ በሰማዕታቱ ማንነት ላይ (ይልቁንም … ቀድሞ “ጀማል” ፤ አዲስ በተገኘው መረጃ ደግሞ “ኤፍሬም” ስለተባለ ወገናችን ማንነት) ፤ በማኅበራዊ ድረ ገጾች ላይ ያየነው ቅጥ ያጣ የሃሳብ (የአመለካከት) ልዩነት (ሽኩቻ) … ነው፡፡ … የቀደመው ወይንስ አዲሱ መረጃ ይሻላል የሚለው ጉንጭ አልፋ ክርክር ብዙም ሊባልበት የሚችል ባይሆንም ቅሉ ፤ በተያያዥነት ያየናቸው ሊታለፉ የማይገባቸው ጉዶዮች አሉና ፤ የመረጃውን ጉዳይ እንደ መንደርደሪያ አድርገን ወደ ጉዳያችን እንዘልቃለን፡፡

ከሁሉ በፊት … በሃይማኖታቸው ምክንያት ሰማዕትነት የተቀበሉትን ወንድሞቻችንን አምላካችን እግዚአብሔር ቅዱሳንን ባከበረበት ክብር ያከብራቸው ፤ ለቅዱሳን ሰማዕታትም ያቀዳጃቸውን የክብር አክሊል ያቀዳጃቸው ፤ ቤተሰቦቻቸውንና ወዳጆቻቸውን ያጽናናቸው ዘንድ ቅዱስ ፈቃዱ ይሁን፡፡

ይህ አሰቃቂ መርዶ ከተሰማባት ከዚያች ክፉ ዕለት እንጀምር … ዜናውን የያዘው የምስል ወድምፅ ውጤት ከአሸባሪ ቡድኑ መለቀቁን ተከትሎ የተለያዩ የዜና አውታሮች ወሬውን እየዘግቡትና … የተለያዩ የውጭ መንግስታትም በኢትዮጵያውያን ላይ የተፈጸመውን ጭካኔ እያወገዙ ባሉበት ሰዓት … መንግስታችን … “የድርጊቱ ሰለባዎች ኢትዮጵያዊያን መሆናቸውን ፤ ግብፅ የሚገኘው ኢምባሲ አላረጋገጠም ፣ በርግጥ ኢትዮጵያዊያን መሆናቸውን ለማረጋገጥ እየጣርን ነው” … ማለቱን ሰምተን ፤ ብዙዎቻችን … “የሟቾቹን አስከሬን አግኝቶ ማረጋገጥ በማይቻልበት ሁኔታ … ምን ነካቸው? … ደግሞስ እኛ የወገኖቻችንን መልክና የፊት ገፅታ አጣነውን? … ቢሳሳቱስ … “ወገኖቻችን ታረዱ” ብለው በማዘናቸውና በመቆጨታቸው … የሚያባጭባቸው ማን ሊኖር?” … የሚሉና ፤ መሰል መሪር ሀዘን ወለድ ሃሳቦችን … መለዋወጣችን ይታወቃል፡፡

ከላይ መንግስትን በወቀስንበት አመክንዮ መሰረትነት … በወንድማችን ኤፍሬም ማንነት ላይ እየተንጸባረቀ ያለውን ልዩነት ለመረዳት እንሞክር ፤ … መንግስት ዜናውን ከሰማበት ቅጽበት አንስቶ መሠዋታቸውን እውቅና ቢሰጠውና አስከትሎም ተገቢ የሚባሉ እርምጃዎችን ቢወስድ ፤ ከዛም የድርጊቱ ገፈት ቀማሾች ኢትዮጵያውያን አለመሆናቸው ቢረጋገጥ ምን ይከሰት ነበር? … እንደ ብዙዎቻችን እምነት … ምንም … እንዲያውም መንግስት ለሕዝብ ያለውን ወገንተኝነት ያሳየበት ክስተት ሆኖ ያልፋል … ወዲህ ደግሞ እንመለስ … አስቀድሞ  “‹ጀማል› የተባለ ሙስሊም ወንድማችን በሊቢያ ከተሠዉ ክርስቲያኖች ጋር አብሮ ተሠዉቷል” ተባለ … ይህም “የኢትዮጵያውያን ሙስሊሞችና ክርስቲያኖች ፍቅር ማሳያ” ተደርጎ ተወሰደ …  በ “‹ጀማል› አምሳልም አንዱ ለሌላው ያለውን ተቆርቋሪነት አየን” አልን … ሁሉም ጥሩ ነው … አንዳችም ችግር የለበትም … በቅርቡ ደግሞ ፤ “የተለያዩ ሁኔታዎች የፈጠሩት የመረጃ ክፍተት እንጅ … ‹ጀማል› ነው ተብሎ ሲነገርለት የነበረው ወንድማችን … ኤፍሬም የተባለ ኤርትራዊ ፤ ቃኘው ሠፈር ይኖር የነበረ ክርስቲያን ነው” የሚል አዲስ መረጃ መጣ … ቀጥሎ ሊሆን የሚገባው ነገር የመረጃውን ትክክለኝነት ማጣራት ነው ፤ … ይህ ከሆነ በሁዋላ ታዲያ ፤ የቀደመውን እንደተቀበልን ሁሉ ይህንን የማንቀበልበት ምን ምክንያት ይኖራል? … በምን ሒሳብ አዲሱ መረጃ (እውነቱ) የቀደመ ፍቅራችንን የሚቀማን ተደርጎ ይቆጠራል? … እንደምንስ እንደ አንድ ሀገር ሕዝብነት ያስተሳሰረንን ገመድ እንደሚያላላ ተደርጎ ይወሰዳል? … እንዲህ ከሆነስ ታዲያ ፤ ከላይ መንግስት ቢሳሳት

እንኳን ወገንተኛነቱን አሳየ እንጅ ሌላ ነገር የለውም (ምንም አይባልም) ፤ ስንል የነበረው ነገር እርግጥ እንዲያ አድርጎ ተሳስቶ ቢሆን ኖሮ አይሰራም ነበር ማለት ነው?

የቀድሞውን … የሀሰት ማንነትና ታሪክ የሚሹ ወገኖች ለዚህ ፍላጎታቸው የተለያዩ ምክንያቶችን እንደሚያቀርቡ ሁሉ ፤ በሌላ በኩል የአዲሱን (የትክክለኛውን) መረጃ መነገርንም የሚደግፉት እንደ አመክንዮ የተለያዩ ምክንያቶችን ያመጣሉ (ከቤተሰቡ ፤ ከቤተክርስቲያን ፤ …. አንጻር) … እውነት ለመናገር ግን የአንድን መረጃ ጠቀሜታ አልያም ጉዳት መተንተን የሚቻለው የመረጃውን ምንነት ካወቁ በሁዋላ ነው … ስለሆነም በኛ አመለካከት መረጃው መነገር የሚኖርበት እውነት ስለሆነ ብቻና ብቻ ነው! … ከዚያ በ|ላ ቋሚ ብዙ ያወራልና … ነገርን እንደ መረዳታችን መጠን … እንደ እምነታችን … እንደ አመለካከታችን … እንደ |ላ ታሪካችን … እንደምንከተለው ርዕዮት … የፈለጋችሁትን ስም ልትሰጡት ትችላላችሁ … እንደፈለግን ልንተረጉመውና ልንበልተው እንችላለን፡፡ … በድጋሚ ግን እነ እንቶኔም ደስ እንዲላቸው … እነንትናም እንዳይከፋቸው ሳይሆን … እውነት ስለሆነ ብቻ እውነቱ መነገር ይኖርበታል፡፡

ለአብነት … ይህንኑ የሀሳብ ልውውጥ አስመልክቶ ዶ/ር በድሉ ዋቅጅራ ፤ የአዲሱን (የትክክለኛውን) መረጃ ይፋ መሆን በመቃወም … “ለሰብዓዊነት የተከፈለን መስዋዕትነት ዝቅ አድርጎ ለሃይማኖት የተከፈለ አድርጎ አቀረበብኝ” ማለታቸውን እናንሳ … አመለካከታቸውን እናከብራለን … ምቅዋማቸው (እምነታቸው) እንዲያ ነው ማለት ነው … ለእርሳቸው … ለሰብዓዊነት የተከፈለ መስዋዕትነት ለሃይማኖት ከሚከፈል መስዋዕትነት ይበልጣል … ያም ሆኖ እውነቱ … የልጆቹ መስዋዕትነት … ለሃይማኖት የተከፈለ መስዋዕትነት መሆኑ ነው … አሸባሪው ቡድን ፤ ለዓለም ሕዝብ ከማስፈራሪያ ቃላት ጋር ባስተላለፈው የምስል ወድምፅ መልዕክቱ … በግልፅ የጠላታችን የኢትዮጵያ ቤተክርስቲያን አባላት በማለት ተናግራል … ግዳዮቹን … የእስልምና እምነትን ስለማመናቸውና ስላለማመናቸው የቁርዓን ጥያቄ እየጠየቀ የሚገድልን ቡድን እያዩ … ሌላ የሌለን ነገር ለመፍጠር … የሌለን ስም ለመስጠት መሞከር ተገቢ አይመስለንም … ከሰማዕታቱ የእምነት ጽናት ፤ ከመታመናቸው ልክ መማር ባይቻል ፤ አድንቆትን መቸር ፤ እርሱም ባይቻል እውነትን እንደወረደ መቀበል ግን ለማንም አይከብድምና ፤ … ደግሞም የክርስቲያን እምነት ተከታዮች ለእምነት ታምኖ መስዋዕት መሆን በሌላ እምነት ተከታዮች የሚያመጣው አንዳች ችግርም የለም ፤ ተከባብሮ የመኖር የቆየ በጎ ልማድንም የሚጋፋበት ሁኔታ የለም … 

እርግጥ በዚህ ዘመን (በዘመነ ሉላዊነት) የእምነት ዋጋዋ እያነሰ ሁሉም ነገር በሰብዓዊነት መጋረጃ ውስጥ እየተጠቀለለ መምጣቱ እየታየ ያለ እና የማይካድ ሀቅ ነው ፤ ዘመኑም ፍጻሜ ዘመን ነውና ይህ ሊሆን ግድ ነው … እናም ክርስቲያን ለሆነ ሁሉ … ይልቁንም ለእኛ ለኦርቶዶክስ ተዋህዶ አማኞች የሚደንቅ አይሆንም ፤ … ከተባበሩት መንግስታት ድርጅት እስከ አለም አቢያተ ክርስቲያናት ህብረት ያሉ ታላላቅ ተቋማት በሰው ልጆች መካከል ያሉ ማናቸውንም ልዩነቶች ለማጥፋትና አንድ ዓለምን ለመመስረት ፤ ግልጥና ስውር እንቅስቃሴ እያደረጉ ይገኛሉ ፤ ያም ቢሆን ፤ አስተዋይና አመዛዛኝ አእምሮ እንዲሁም ያሻውን የሚመርጥበት ነጻ ፈቃድ ከፈጣሪው የተቸረ የሰው ልጅ እንደሚመርጠው የሕይወት ጎዳና መለያየት ፤ የሕይወት አቅጣጫውም እንደሚለያይ አይጠረጠርም፡፡ የልዩነታችን እውነታ እንዳለ ሆኖ ታዲያ ፤ በተለይ በሀገራችን በኢትዮጵያ አሁን አሁን ፤ እኛ ኦርቶዶክሳውያን ከሌሎች የእምነት ተከታይ ወገኖቻችን ጋር ባለን ግንኙነት ፤ አንድነታችንን ፤ መተሳሰባችንን ፤ መከባበርና መገናዘባችንን የምናሳይበት መንገድ ሊጤን የሚገባው ነው ፤ … “እግዚአብሔር በስጋ መገለጡን (መውረድ መወለዱን) የማያምን ከእግዚአብሔር ዘንድ አይደለም” እንዲል መጽሐፍ …

ወንጌልና የአባቶቻችን ትውፊት የሚያስተምረን ፤ አንድ ክርስቲያን ከምንም ነገር አስቀድሞ ክርስቲያን መሆኑን ነው ፤ የአገር ተወላጅነት (ኢትዮጵያዊነት) ወይም ማንኛውም ሌላ ዓይነት እሴት ዋጋ ሊኖረው የሚችለው ከክርስትናችን ጋር ከሚፈጥረው ዝምድና አንጻር ብቻና ብቻ ነው ፤ … እንዲያ ባይሆን ኖሮ ፤ ሀገራችን በሰማይ እንደሆነ ያስተማሩ ፤ እነ ቅዱስ ጳውሎስ ክርስትናቸውን ከይሁዲነታቸው አስበልጠው ሁሉን ትተው ባልተሰደዱ ነበር  ፤ ተስአቱ ቅዱሳንም ሮም መከራ ባጸናችባቸው ጊዜ ሀገራቸውን ጥለው በባሕልም በቋንቋም ወደማትመስላቸው ወደ ኢትዮጵያ ባልፈለሱም ነበር ፤ … በአጭሩ ፤ ክርስቲያን ኢትዮጵያዊ እንጂ ኢትዮጵያዊ ክርስቲያን ሊኖር አይችልም ፤ አስቀድሞ ክርስቲያን ከዚያ ደግሞ በትውልድ ስፍራው ኢትዮጵያዊ … በአጠቃላይ … ክርስትና ላይ ያልተመሰረተ ኢትዮጵያዊነት ክርስትናን ወደ መካድ ማድረሱ አይቀሬ መሆኑ ሊስተዋል ይገባል፡፡ በአጭሩ በሃይማኖት ዋጋ ፤ ባሕልን ዘርንና አብሮ መኖርን ለመግዛት ፤ ለማጠንከርና የማንነት መሰረቶች ለማድረግ መንቀሳቀስ ፤ መጨረሻው የክርስትናን ፋይዳ ከህልውና አስኳልነት ወደ ኮስሜቲክ ማጊያጌጫነት ወደ ማኮሰስ ያደርሳል፡፡

ለምሳሌ … የቀድሞው የሀሰት መረጃ አያስፈልግም ከሚሉት ወገን የሆነ … “ፍቅራችንን በውሸት ሃውልት ላይ አናቆምም!!” … በሚል ርዕስ … በአካል ንጉሴ በተባሉ ሰው የተጻፈን አጭር ጽሑፍ ፤ የተወሰነ ክፍል እናሳያችሁ … ጽሑፉ ስለመቻቻል እያብራራ ነው … “የኛ ግን ከዚህ ይለያል” (የእኛን መቻቻል ማለታቸው ነው) “ሰዎች እዚህ እኮ /ወሎ ማለቴ ነው/ “አይ ይህ ሃይማኖት አልከፈለኝም (አላዋጣኝም ማለታቸው ነው)  ቀይሬ ልሞክረው” ብሎ የሌላኛው ሰው ቤተ እምነት ውስጥ የምታገኙት ፣ “ሚስቴ እምነቷ ሌላ ነው ፤ የኔ ደግሞ ወዲህ ነው፡፡” የሚል ፣ ጋሽ ስብሃት እንዳለው “እግዚአብሔር ይመስገን መስጊድ ተሰራልን ፤ አልሃምዱሊላሂ ታቦታችን በሰላም ገባ” የሚል ሉላዊነት ቀድሞ የገባው የዋህ የፍቅር ሰው ነው የማህበረሰቡን አስተሳሰብ ያነጸው … እኔ ግን አምናለሁ ፤ በኛ ዘንድ መቻቻል ሳይሆን ህይወት አለ - በቃ ኑሮ ነዋ እኛ ጋ ያለው፡፡ ለታቦት ስለት የሚያገባ ሙስሊም ፣ የሸሆችን በር የሚያንኳኳ ክርስቲያን መቻቻል ምናምን ብሎ ቃል ወይም የውሸት የፍቅር ሃውልት አያስፈልገውም” በማለት ይቀጥላሉ … እዚህ ላይ ታዲያ የጽሑፉን ሃሳብ ባናምንበትም የጸሐፊውን እምነት እንደምናከብር እንግለፅና ወደ ጉዳያችን እንመለስ … ትልቁ ነጥብ እዚህ ላይ ነው … ጸሐፊው መሬት ላይ (በሕዝቡ) መካከል ያለውን ነገር ከመቻቻል በላይ የጠነከረና እንዲያውም ሕይወት እንደሆነ ይሞግታሉ … እንደኛ አረዳድ (አመለካከት) ግን ፤ ይህ መቻቻል (መገናዘብ) አይደለም … ይህ ክርስቲያን ለሆነ ሁሉ ጥፋት እንጅ ሕይወት አይሆንም … ባጭሩ ስም ሊወጣለት ካስፈለገ … ስሙ መቀላቀል ነው … አልያም መበራረዝ … እንደሚገባንም መቀላቀል(መበራረዝ) ለማናችንም አይጠቅምም …

ስለሆነም እኛ ክርስቲያኖች ይህን መሰሉን አመለካከት ልናስተካክል ይገባል እንላለን … 60 እና 80 ዘመን በምንቆይበት ምድራዊ ሕይወታችን ስለሚሆነው አብሮ የመኖር ነገር ከመጠን ባለፈ በመጨነቅ ፤ ተስፋ የምናደርገውን ዘላለማዊ ሕይወት እንዳናጣ ፤ ሁሉን ነገር በልክ መያዝ ያስፈልጋል ፤ አብሮ መኖርን ፤ መከባበርን ፤ መተሳሰብን ፤ መገናዘብን ስናስብ ፤ …. በእግዚአብሔር በአምላካችን ፊት እንዴት እየተመላለስን እንደሆነ … ትዕዛዛቱ (ህግጋቱ) ለመንገዳችን መብራት ሆኖ እየመራን ስለመሆኑ … የቤቱ (የቤተክርስቲያን) ስርዓት ምን እንደሚል … ከሌሎች የእምነት ተከታይ ቤተሰቦቻችን ፤ ጎረቤቶቻችን ፤ የስራ ባልደረቦቻችን ፤ … ጋር ያለን ግንኙነት ፈጣሪ በሚወደው መልኩ ስለመሆኑ በተጓዳኝ በጥልቀት ማሰብ ይኖርብናል፡፡

በመጨረሻ … እንዲህ ማለታችንን  የጠብ አጫሪነት አድርጎ የሚወስድ አንባቢ አይጠፋምና ማሳሰቢያ ቢጤ ብናክል አይከፋምና እነሆ ፤ … የተከበራችሁ አንባብያን ሆይ … ሃሳባችን ባጭሩ … ቅድሚያ ለሚገባው ቅድሚያ መስጠትን ከሰማዕታቱ እንማር ነው! … መጻተኞች በሆንባት በዚህች ምድር ከሚሆነው ነገር በላይ ለእኛ ለክርስቲያኖች ሊያሳስበን የሚገባ የዘላለማዊ መንግስት ጉዳይ አለብን ነው! ፤ እንጅስ ከሰው ሁሉ ጋር በሰላም እንድንኖር የአምላካችን ፈቃድ ይህች ናት … በሌሎች የእምነት ተከታዮች ላይ የማይገባ ጥላቻን ስለማብቀል አይደለም ፤ በተቋሞቻቸውም ላይ ግፍን ስለመፈጸምም አይደለም … ክርስትና እንዲህ ያለውን ድርጊት አያስተምርምና … እንዲያውም የክርስቲያኖችን ሕይወት የቀጠፉት ሰዎች እንኳ ድርጊታቸው የሚወገዝ ቢሆንም ቅሉ እንዲያ ያደረጉት በክፉ መንፈስ እየተመሩ በመሆኑ ፤ ልቦና እንዲሰጣቸው ምህረትንም እንዲያገኙ ከእግዚአብሔር መለመንን የሚያስተምር ነው … ክርስትና!

በቀረውስ … እውነቱን እውነት ሀሰቱንም ሀሰት ማለት ይገባል!!

ቸር ያቆዬን

ወስብሐት ለእግዚአብሔር፡፡